唔使加油,香港無事

「渣打香港馬拉松係一項體育活動,我哋唔希望加入政治元素」

「我講得好清楚,逢親涉及政治元素,我都唔想涉及在內。」

我諗佢真係講得好清楚,兩句一齊睇,後一句先係前一句所指嘅意思

意思就係:「渣打香港馬拉松係一項體育活動,我哋唔希望加入政治元素」,呢句官方口吻本來就係為左掩埋唔想俾政治搞到佢嘅心果句而講。

如果對比番前兩日仲意氣風發講:「香港照我看一向都在加油,只有進步不會退步,所以香港加油的含意,我覺得無問題。」嘅佢,成件事係幾有意思──典型嘅唔知紅線喺邊嘅例子。

介紹下渣馬籌委會主席嘅高威林,佢係BBS、大型體育活動事務委員會主席,香港業餘田徑總會首席副會長、亞田聯創會成員。根據《香港馬拉松的足跡》呢本書記載,佢90年代起已經係田總主席,港深馬拉松亦係佢一手締造,亦即係渣馬嘅前身。

係呀,大家知唔知第一屆渣馬正正就係為左97回歸「安撫人心」而舉行。(但香港第一次嘅馬拉松比賽係1969年喺元朗搞。)

佢又點會估到搞左呢壇嘢廿幾年都會搞到咁樣衰?其實佢地有經驗架,7年前,記協出於劉進圖事件就喺渣馬發起過「藍絲帶行動」,當時渣馬仲表示:「大會尊重市民及跑手有不同表達方式及聲音。」

補充兩點啦

第一、
今次參賽嘅條件係全部都必須打左兩針(即係迫針啦)。近近地好似台灣,人地年尾都搞馬拉松但係要求就只係「打過至少1劑且滿14天疫苗」或「若曾染疫後的康復書或解隔書」或「近3天的快篩或PCR陰性」3選1就可以參賽。

第二、
馬拉松係源於公元前 490 年古希臘時代雅典與波斯一場戰役,當時希臘擊敗波斯軍隊,雅典軍隊傳令菲迪皮塔(Pheidippides),由馬拉松平原徒步跑回雅典城,向城內報捷。後人為左紀念,就每年重走一次當年26英里長嘅路線。

記得2013年波士頓馬拉松大爆炸之後,「Boston Strong」嘅旗幟喺之後嘅幾屆隨處可見,而香港連想幫自己嘅地方加油都成為連主辦都唔知道嘅紅線,仲叫人「跑出信念」?

撰:今天我
────────────────
想投稿?快啲Click入”https://forms.gle/L8iCv8wz68JJx6JPA“提交你嘅文稿啦~
和你報嘅小編們會努力爬文,揀選心水文章呈獻畀每一個”你”!

0則留言

留言

Login

Welcome! Login in to your account

Remember me Lost your password?

Lost Password